ຟາກຄວາມດີໄຫ້ມີ

ຟາກຄວາມດີໄຫ້ມີ

lus qhuab qhia cov ntxhais yuav mus ua luag nyab..

 
19/10/2012| 10:28:49 

 

Kuv thov hais ib co lus zoo
Foom koob hmoov rau koj lub neej
Koj tus kheej thiab koj tsev neeg
Neb ob leeg kom sib sib hlub
Mus tu tub tu kiv kom vam
Nrhiav laj kam kom tau txoj zoo
Kom lwm xyoo neb tau tus tub
Es lwm hnub ho yug tus ntxhais
Thov koj pais ua lub siab ntev
Ua niam tsev kom zoo rau luag

Ua neeg nquag koj thiaj tau noj
Tsis txhob coj li thaum koj hluas
Tsis txhob qhuas tias koj zoo tshaj
Tsis txhob npaj rhuav koj tsev neeg
Txhob mus ntseeg lwm tus dag ntxias
Nco ntsoov tias txoj kev ua nyab
Koj rov qab tsis tau lawm mog
Vim koj yog ib tug ntxhais qhua
Nco ntsoov ua txoj kev zoo xwb
Vim neb twb daj dee sib tau

Kav tsij sau tag koj lub siab
Rau koj thiab tus txiv lub neej
Tsis txhob pheej xav ua siab phem
Txhob lam cem koj tus txiv mog
Vim nws yog koj nplooj me siab
Hlub nws thiab nws txiv nws niam
Vim ntawv tiam neb thiaj sib tau
Thiaj sib sau ua ib lub neej
Koj tus kheej hlub nws kom txaus

Txog hnub laus thiaj li tsim nyog
Vim koj yog niam nkauj txhav qaib
Luag thiaj saib koj no muaj nqi
Luag thiaj li cia siab rau koj
yuav tsum coj lub siab kom ntev
Tu vaj tsev kom nyob du dais
Txhob lam hais tias nej tsev hmoob
Nej yog noob tsis zoo thiab phem
Txhob lam cem koj tus txiv tias

Ntsej muag qias thiab tsej muag xuab
Tsis txhob muab nws piv lwm tus
Txhob xyaum mus twv txiaj yuam pov
Tsam koj cov me nyiaj qab nas
Nws poob tas ces koj mam nco
Ces thaum no yuav lig lawm mog
Ho hais txog ntawm koj tus kheej
Tsis txhob pheej xav tau tus tshiab
Koj lub siab cog kiag rau nws
Koj lub ntsws muaj nws ib leeg

Yuav tsum ntseeg neb txoj kev hlub
Tsam lawm hnub koj ho khuv xim
Nco ntsoov cim kuv cov lus cia
Kuv tsuas qhia li kuv paub xwb
Vim koj twb yog neeg laus lawm
Yuav tsum kawm ua neeg txim txiaj
Xav muaj nyiaj yuav tau mus khwv
Txhob mus twv pem casino
Tsam koj caum tsis tau lwm tus
Txij no mus lawm yav tom ntej

pom luag tej muaj tub zoo nraug
Txhob lam qaug ua neeg liam ntsuav
Luag tsuas rhuav neb lub neej xwb
Vim koj twb yog neeg muaj tus
Tsis txhob mus ua dog ua dig
Tsam ces lig rau koj tus kheej
Koj cov neej thiab koj cov tsav
Luag thiaj xav tuaj saib koj mog
Vim koj yog lawv ib tug ntxhais
Txawm koj pais ua lub neej tshiab
Lawv lub siab yeej tseem hlub koj
Lawv yuav coj Txoj koob txoj

Txoj kev zoo Nrog kev sam feej
Mus ua neej sib sib hlub mog
Txhob xav txog koj txoj kev hluas
Tsam neej puas ces ntxhov koj siab
Ua nyab tshiab yeej tsis yooj yim
Twb yog vim yus yog nkauj fa
Niam txais nta thiab txiv txais tog
Nws tsuas yog lam pheej txoj hmoo
Tus txiv zoo ces yog thawj tug
Luam thawj ntsug thiaj li tsis poob
Txiv neej hmoob ces zoo sib xws

Lub siab ntsws yeej tsis txawv hlo
Yog li no txij hnub no mus
Nco cov lus uas niam txiv qhia
Muab khaws cia tau coj mus siv
hlub koj tus txiv kom mus ib txhis mog.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: